സഞ്ചാരികള്‍ക്ക് പ്രിയം ദുബൈ വിമാനത്താവളത്തോട്

ദുബായ്: ദുബൈ വിമാനത്താവളം സഞ്ചാരികള്‍ക്ക് കൂടുതല്‍ പ്രിയപ്പെട്ടതാവുന്നു. ഒക്ടോബറില്‍ 6 കോടി 42 ലക്ഷം യാത്രക്കാരാണ് ദുബൈ വഴി എത്തിയത്. ഈ വര്‍ഷം ഇതിനകം 6.9 കോടിയിലേറെ ആളുകളുമെത്തി. കൂടുതല്‍ ടിക്കറ്റുകളും പതിവുപോലെ ഇന്ത്യയിലേക്കായിരുന്നു. ഒമ്പതു ലക്ഷത്തിലേറെ പേര്‍. ബ്രിട്ടനിലേക്ക് അഞ്ചു ലക്ഷത്തോളം പേരും സൗദിയിലേക്ക് 3.4 ലക്ഷം പേരും യാത്ര ചെയ്തു. 35,294 വിമാന സര്‍വീസുകളാണ് നടന്നത്. മുന്‍ മാസത്തേക്കാള്‍ 2.7 ശതമാനവും കഴിഞ്ഞ വര്‍ഷത്തേക്കാള്‍ 6.8 ശതമാനവും അധികം യാത്രികരാണ് ദുബൈ വിമാനത്താവളം ഉപയോഗിച്ചത്.

ചരക്കു നീക്കത്തിലും മികച്ച വര്‍ധന രേഖപ്പെടുത്തി. 2.3 ലക്ഷം ടണ്‍ സാധനസാമഗ്രികളാണ് വിമാനത്താവളം മുഖേന അയച്ചത്. പോയവര്‍ഷം ഈ സമയം നടന്ന ചരക്കുനീക്കത്തേക്കാള്‍ 9.5 ശതമാനം അധികമാണിത്. കാര്‍ഗോ നീക്കത്തില്‍ ഏറ്റവും മികച്ച വര്‍ധനയാണിതെന്ന് ദുബൈ വിമാനതാവള സി.ഇ.ഒ പോള്‍ ഗ്രിഫിത്ത്‌സ് വ്യക്തമാക്കി. ഈ വര്‍ഷം അവസാനത്തോടെ 8.3 കോടി യാത്രക്കാര്‍ എത്തുമെന്നാണ് കണക്കൂകൂട്ടല്‍.