ഗർഷോം
ബാംഗ്ലൂർ: 2020 ലെ ഗർഷോം രാജ്യാന്തര പുരസ്കാരങ്ങൾ സെപ്റ്റംബർ 17 ശനിയാഴ്ച ഗോവയിൽ നടക്കുന്ന ചടങ്ങിൽ ഗോവ ഗവർണർ പി എസ് ശ്രീധരൻ പിള്ള സമ്മാനിക്കും. ഗോവ വ്യവസായ വകുപ്പ് മന്ത്രി മവിൻ ഗൊഡിഞ്ഞോ, ഗോവ മുൻ മുഖ്യമന്ത്രി ദിഗംബർ കാമത് എം എൽ എ, സൗത്ത് ഗോവ പ്ലാനിങ് ആൻഡ് ഡെവലപ്മെൻറ് അതോറിറ്റി ചെയർമാൻ കൃഷ്ണ സാൽകാർ എം എൽ എ എന്നിവർ വിശിഷ്ടാഥിതികളായി ചടങ്ങിൽ സംബന്ധിക്കും. ശനിയാഴ്ച വൈകുന്നേരം 6 ന് പനാജിയിലെ ഫോർച്യൂൺ മിരാമർ ഐടിസി ഹോട്ടലിൽ നടക്കുന്ന അവാർഡ് ദാന ചടങ്ങിൽ വിവിധ രാജ്യങ്ങളിൽ നിന്നെത്തുന്ന നൂറോളം മലയാളികൾ പങ്കെടുക്കുന്നുണ്ട്.
ബിനോയി സെബാസ്റ്റ്യൻ (കുവൈറ്റ്), സുപ്രിയ ചെറിയാൻ (ആസ്ട്രേലിയ), ശാന്തൻ നാണു (ഗോവ), വി ജെ മാത്യു (ഇന്തോനേഷ്യ), മോഹൻ നായർ (ഗുജറാത്ത്) എന്നിവർക്കാണ് 2020 ലെ ഗർഷോം രാജ്യാന്തര പുരസ്കാരങ്ങൾ സമ്മാനിക്കുന്നത്. മികച്ച ഓർഗനൈസഷനുള്ള പുരസ്കാരം എൽ ഷെഡ്ഡായി ചാരിറ്റബിൾ ട്രസ്റ്റിനും മികച്ച മലയാളി സംഘടനക്കുള്ള പുരസ്കാരം ധാക്ക മലയാളി അസോസിയേഷനും സമ്മാനിക്കും.
ആസ്ട്രേലിയയിലെ മെൽബണിൽ 2020 ഒക്ടോബർ 3 നാണ് 15- മത് പുരസ്കാരദാനച്ചടങ്ങു നടത്തുവാൻ തീരുമാനിച്ചിരുന്നത്. കോവിഡ് നിയന്ത്രണങ്ങളെ തുടർന്ന് പുരസ്കാര ദാനച്ചടങ്ങു മാറ്റിവയ്ക്കുകയായിരുന്നു.
സ്വപ്രയത്നംകൊണ്ട് കേരളത്തിന് പുറത്ത് ജീവിത വിജയം നേടുകയും, മലയാളികളുടെ യശ്ശസ് ഉയര്ത്തുകയും ചെയ്ത പ്രവാസി മലയാളികളെ ആദരിക്കുവാന് ബംഗ്ലൂരു ആസ്ഥാനമായ ഗര്ഷോം ഫൗണ്ടേഷന് 2002 മുതലാണ് ഗര്ഷോം പുരസ്കാരങ്ങള് നല്കി വരുന്നത്. ഇന്ത്യ, ജപ്പാൻ, മലേഷ്യ, കുവൈറ്റ്, യു എ ഇ, നോർവേ എന്നീ രാജ്യങ്ങളിലെ വിവിധ നഗരങ്ങൾ ഗർഷോം അവാർഡ് ദാനച്ചടങ്ങുകൾക്കു ആതിഥ്യമരുളിയിട്ടുണ്ട്.
കോവിഡ് നിയന്ത്രണങ്ങളെ തുടർന്ന് മാറ്റിവച്ച 2021 ലെ ഗർഷോം പുരസ്കാരങ്ങൾ നവംബർ 20 ന് അസർബൈജാനിലെ ബാക്കുവിലും 17-മത് ഗർഷോം പുരസ്കാരങ്ങൾ നവംബർ 22 ന് ഗബാലയിലും നടക്കുന്ന ചടങ്ങുകളിൽ വച്ച് സമ്മാനിക്കും.
15 -മത് ഗർഷോം രാജ്യാന്തര പുരസ്കാര ജേതാക്കളെക്കുറിച്ചുള്ള കൂടുതൽ വിവരങ്ങൾ അറിയാൻ ഇവിടെ CLICK ചെയ്യുക
പ്രവാസികൾക്കും അവരുമായി ബന്ധപ്പെടുന്നവർക്കും ഉപകാരപ്രദമായേക്കാവുന്ന വാർത്തകളാണ് ഗർഷോം ഓൺലൈനിലൂടെ പ്രസിദ്ധീകരിക്കുന്നത്. വാർത്തകളുമായി ബന്ധമില്ലാത്ത കമെന്റുകൾ ഇവിടെ ഉൾപ്പെടുത്തുവാൻ കഴിയില്ല. വായനക്കാർ ദയവായി സഹകരിക്കുക.