ഗർഷോം
ന്യൂഡല്ഹി: ഇന്ത്യയിലെ 57 ശതകോടീശ്വരന്മാരുടെ പക്കലുള്ള സമ്പത്ത് രാജ്യത്തെ 70 ശതമാനം ജനങ്ങളുടെ കൈവശമുള്ള സമ്പത്തിന് തുല്യമെന്ന് റിപ്പോര്ട്ട്. രാജ്യാന്തര തലത്തില് ദാരിദ്ര്യ നിര്മാര്ജനത്തിനായി പ്രവര്ത്തിക്കുന്ന ഓക്ഫാമിന്റെ വാര്ഷിക റിപ്പോര്ട്ടിലാണ് ഇക്കാര്യമുള്ളത്. രാജ്യത്തെ ജനങ്ങളുടെ വരുമാനത്തിലെ അന്തരം വര്ധിച്ചതായി റിപ്പോര്ട്ട് വ്യക്തമാക്കുന്നു.
ഇന്ത്യയിലെ മൊത്തം സമ്പത്തിന്റെ 58 ശതമാനവും ഒരു ശതമാനം മാത്രം വരുന്ന അതിസമ്പന്നരുടെ പക്കലാണ്. ഇന്ത്യയില് മൊത്തം 84 ശതകോടിശ്വരന്മാരുണ്ടെന്നാണ് കണക്ക്. ഏകദേശം 20248 കോടി ഡോളറിന്റെ സമ്പത്ത് ഇവരുടെ കയ്യിലുണ്ട്. 1930 കോടി ഡോളറുള്ള മുകേഷ് അംബാനി, 1670 കോടി ഡോളറുള്ള ദിലീപ് ഷാംഗ്വി, 1500 കോടി ഡോളറുള്ള അസിം പ്രേംജി എന്നിവരാണ് പട്ടികയില് മുന്നില് നില്ക്കുന്ന അതിസമ്പന്നര്.
ആഗോള ജനസംഖ്യയുടെ പകുതി പേരുടെ കൈവശമുള്ളതിന് തുല്യമായ സമ്പത്ത് അതിസമ്പന്നരായ എട്ടു പേരില് ഉണ്ടെന്നും റിപ്പോര്ട്ട് പറയുന്നു. 255.7 ലക്ഷം കോടി ഡോളറാണ് ലോകത്തെ മൊത്തം സമ്പത്ത്. ഇതില് 6.5 ലക്ഷം കോടി ഡോളറും അതി സമ്പന്നരുടെ കയ്യിലാണെന്നും റിപ്പോര്ട്ട് വ്യക്തമാക്കുന്നു. ലോകത്തെ മറ്റു രാജ്യങ്ങളെ അപേക്ഷിച്ച് തൊഴില് വേതനത്തില് ഇന്ത്യയടക്കമുള്ള ഏഷ്യന് രാജ്യങ്ങളില് വലിയ ലിംഗ വിവേചനമുണ്ടെന്നും ഇന്ത്യയില് പുരുഷന്മാരെ അപേക്ഷിച്ച് സ്ത്രീകള്ക്കുള്ള വേതന വ്യത്യാസം 30 ശതമാനമാണെന്നും ഓക്ഫോമിന്റെ പഠന റിപ്പോര്ട്ടില് പറയുന്നു.
പ്രവാസികൾക്കും അവരുമായി ബന്ധപ്പെടുന്നവർക്കും ഉപകാരപ്രദമായേക്കാവുന്ന വാർത്തകളാണ് ഗർഷോം ഓൺലൈനിലൂടെ പ്രസിദ്ധീകരിക്കുന്നത്. വാർത്തകളുമായി ബന്ധമില്ലാത്ത കമെന്റുകൾ ഇവിടെ ഉൾപ്പെടുത്തുവാൻ കഴിയില്ല. വായനക്കാർ ദയവായി സഹകരിക്കുക.