നോട്ട് പിന്‍വലിക്കല്‍: ആദായ നികുതി വകുപ്പ് പിടിച്ചെടുത്തത് 2,900 കോടി

ന്യൂഡല്‍ഹി: നോട്ട് പിന്‍വലിക്കില്‍ തീരുമാനം നിലവില്‍ വന്നതിന് ശേഷം രാജ്യത്തുടനീളം നടത്തിയ റെയ്ഡുകളില്‍ ആദായ നികുതി വകുപ്പ് പിടിച്ചെടുത്തത് 2,900 കോടി രൂപ. ഇതില്‍ 76 കോടി രൂപ പുതിയ 2000 രൂപയുടെ നോട്ടുകളാണ്. നോട്ട് പിന്‍വലിക്കല്‍ തീരുമാനം നിലവില്‍ വന്നതിന് ശേഷം 586 റെയ്ഡുകളാണ് രാജ്യത്താകമാനം ആദായ നികുതി വകുപ്പ് നടത്തിയത്.

ഏറ്റവും കൂടുതല്‍ പണം പിടിച്ചെടുത്തിരിക്കുന്നത് ചെന്നൈയില്‍ നിന്നാണ്. ഒരു റെയ്ഡില്‍ മാത്രം ചെന്നൈയില്‍ നിന്ന് 100 കോടി രൂപ പിടിച്ചെടുത്തിട്ടുണ്ട്. ചെന്നൈയില്‍ നിന്ന് ആകെ പിടിച്ചെടുത്ത പണം 140 കോടി രൂപയാണ്. ഇതിന് പുറമേ 56 കോടിയുടെ സ്വര്‍ണ്ണവും പിടിച്ചെടുത്തിട്ടുണ്ട്. ഡല്‍ഹിയിലെ അഭിഭാഷകന്റെ വീട്ടില്‍ നിന്നും 14 കോടി രൂപ ആദായ നികുതി വകുപ്പ് പണമായി പിടിച്ചെടുത്തിട്ടുണ്ട്. ഇതിനൊപ്പം തന്നെ ഇയാളുടെ അക്കൗണ്ടുകളില്‍ നിന്ന് 19 കോടിയുടെ കള്ളപ്പണ നിക്ഷേപവും ആദായ നികുതി വകുപ്പ് കണ്ടെടുത്തിട്ടുണ്ട്.

ബാങ്ക് ഓഫ് മഹാരാഷ്ട്രയുട പൂനെ ബ്രാഞ്ചില്‍ നിന്നും 9 കോടി രൂപ പിടിച്ചെടുത്തിരുന്നു. ഇതില്‍ 8 കോടിയും പുതിയ 2000 രൂപയുടെ നോട്ടുകളാണ്. സി.സി.ടി.വി ദൃശ്യങ്ങളുടെ കൂടി സഹായത്തോടെയാണ് പൂനയിലെ ബാങ്ക് ഓഫ് മഹാരാഷ്ട്രയില്‍ നിന്ന് പണം പിടിച്ചെടുത്തത്. ഇതുമായി ബന്ധപ്പെട്ട് ആദായ നികുതി വകുപ്പ് ബാങ്കിലെ മറ്റ് അക്കൗണ്ടുകളില്‍ പിന്നീട് നടത്തിയ പരിശോധയില്‍ 94.50 ലക്ഷവും പിടിച്ചെടുത്തു. ഇതില്‍ 84 ലക്ഷവും 2000 രൂപയുടെ പുതിയ നോട്ടുകളാണ്.