ഈ മരുന്നൊന്നും കഴിക്കല്ലേ

ഡോക്ടറെ കാണാന്‍ മെനക്കെടാതെ സ്വയം ചികിത്സയ്ക്ക് വിധേയരാകുന്നവരാണ് നമ്മളില്‍ പലരും. ഉദാഹരണത്തിന് പനിയും തലവേദനയും വന്നാലുടന്‍ മെഡിക്കല്‍ സ്റ്റോറിലേക്ക് ഓടുന്നവരാണ് കൂടുതലും. എന്നാല്‍ ഈ ഓട്ടത്തിന് മുമ്പ് ഒരു കാര്യം അറിഞ്ഞിരിക്കുക, നിങ്ങളുടെ ഇഷ്ടമരുന്നുകള്‍ പലതും നിരോധിച്ചവയാണ്. സ്വയം ചികിത്സയ്ക്ക് വിധേയരാകുന്നവരില്‍ പലരും ഇപ്പോഴും അറിഞ്ഞിട്ടുണ്ടാവില്ല ഡോളോ അടക്കമുള്ള മരുന്നുകള്‍ കേന്ദ്രസര്‍ക്കാര്‍ മാസങ്ങള്‍ക്ക് മുമ്പേ നിരോധിച്ച വിവരം.

രണ്ടോ അതിലധികമോ ഡോസുകള്‍ നിശ്ചിത അളവിലുമധികം ചേര്‍ത്ത് നിര്‍മ്മിക്കുന്നെന്ന് കണ്ടെത്തിയ മരുന്നുകളാണ് നിരോധിച്ചത്. മാര്‍ച്ച് 12ന് പുറത്തിറക്കിയ ഉത്തരവ് പ്രകാരം 300ലധികം മരുന്നുകളാണ് നിരോധിച്ചിരിക്കുന്നത്. പ്രമേഹം, ശ്വാസകോശരോഗങ്ങള്‍, ദഹനരോഗങ്ങള്‍ എന്നിവയ്ക്കുള്ള മരുന്നുകളും വേദനസംഹാരികളുമാണ് പ്രധാനമായും നിരോധിച്ച മരുന്നുകളുടെ പട്ടികയിലുള്ളത്. എന്നാല്‍, പല ഡോക്ടര്‍മാരും ഫാര്‍മസികളും ഈ നിരോധനത്തെക്കുറിച്ച് ഇപ്പോഴും വ്യക്തതയില്ലാത്തവരാണെന്ന് പരാതി ഉയരുന്നുണ്ട്.