ഗർഷോം
ദോഹ: ഖത്തറില് തൊഴിലാളികളുടെ പാസ്പോര്ട്ടുകള് തൊഴിലുടമകളോ കമ്പനികളോ സൂക്ഷിക്കുന്നത് ശിക്ഷാര്ഹമായ കുറ്റമാണെന്ന് ആഭ്യന്തരമന്ത്രാലയം. ഇതുമായി ബന്ധപ്പെട്ട പരാതികള് പോലീസില് സമര്പ്പിക്കുന്നതിനു പകരം ഭരണ വികസന, തൊഴില് സാമൂഹികകാര്യ മന്ത്രാലയത്തിനാണ് നല്കേണ്ടതെന്നും ആഭ്യന്തര മന്ത്രാലയം അധികൃതര് അറിയിച്ചു. പരാതി ലഭിക്കുന്ന പക്ഷം ഇത്തരം തൊഴിലുടമകള്ക്കെതിരെ നടപടിയെടുക്കും.
സിവില് ഡിഫന്സ് ആസ്ഥാനത്ത് സംഘടിപ്പിച്ച സുരക്ഷാ ബോധവല്ക്കരണ സെമിനാറിലാണ് ആഭ്യന്തര വകുപ്പ് അധികൃതര് ഇക്കാര്യം സൂചിപ്പിച്ചത്. സുഹൃത്തുക്കള്ക്കായി വിസയ്ക്ക് അപേക്ഷിക്കാമോയെന്ന ചോദ്യത്തിന് അത്തരം വിസകള് അനുവദിക്കുന്നില്ലെന്നും താല്പര്യമുള്ള വ്യക്തികള്ക്കായി ടൂറിസ്റ്റ് വിസയ്ക്ക് അപേക്ഷിക്കാമെന്നും മറുപടി നല്കി. ഖത്തറിന്റെ പുറത്തുവെച്ച് ഐഡി നഷ്ടപ്പെട്ടാല് അക്കാര്യം വ്യക്തമാക്കി മാതൃ രാജ്യത്ത് റിപ്പോര്ട്ട് രജിസ്റ്റര് ചെയ്യുകയും ആ റിപ്പോര്ട്ട് ഖത്തറിലേക്ക് അയയ്ക്കുകയുമാണ് വേണ്ടത്. 500 റിയാല് പിഴ അടച്ച് പുതിയ ഐഡി സ്വന്തമാക്കാനാകും.
ഇന്ത്യ, ശ്രീലങ്ക, ഫിലിപ്പൈന്സ്, പാകിസ്താന് ഉള്പ്പടെയുള്ള വിവിധ രാജ്യങ്ങളില് നിന്നായി വലിയതോതില് പ്രവാസി സമൂഹം സെമിനാറില് പങ്കെടുത്തു.
പ്രവാസികൾക്കും അവരുമായി ബന്ധപ്പെടുന്നവർക്കും ഉപകാരപ്രദമായേക്കാവുന്ന വാർത്തകളാണ് ഗർഷോം ഓൺലൈനിലൂടെ പ്രസിദ്ധീകരിക്കുന്നത്. വാർത്തകളുമായി ബന്ധമില്ലാത്ത കമെന്റുകൾ ഇവിടെ ഉൾപ്പെടുത്തുവാൻ കഴിയില്ല. വായനക്കാർ ദയവായി സഹകരിക്കുക.