ഗർഷോം
ലോകത്തിന്റെ പ്രതീക്ഷകള്ക്ക് വീണ്ടും മങ്ങലേല്പ്പിച്ച് കൊവിഡ് വാക്സിന്റെ പരീക്ഷണം ഓക്സ്ഫഡ് സര്വകലാശാല നിര്ത്തിവെച്ചു. പരീക്ഷിച്ചവരില് ഒരാളില് പ്രതികൂല ഫലം കണ്ടതിനെ തുടര്ന്നാണ് ഓക്സ്ഫഡ് വാക്സീന് പരീക്ഷണം നിര്ത്തിവച്ചത്. കോവിഡ് വാക്സീന് വൈകാന് സാധ്യത. ഇന്ത്യയിലെ പുനെ സിറം ഇന്സ്റ്റിറ്റ്യൂട്ട് അടക്കം വിവിധ രാജ്യങ്ങളിലെ സ്ഥാപനങ്ങള് പരീക്ഷണത്തോട് സഹകരിച്ചിരുന്നു. വാക്സിന് വിജയമായാല് വാങ്ങാന് ഇന്ത്യയും കരാര് ഉണ്ടാക്കിയിരുന്നു. ഓക്സ്ഫഡ് സര്വകലാശാലയും ആസ്ട്ര സെനകയും ചേര്ന്ന് വികസിപ്പിക്കുന്ന കോവിഡ്19 പ്രതിരോധ വാക്സീന് അവസാന ഘട്ട പരീക്ഷണത്തിലായിരുന്നു.
ജലദോഷ പനിയുണ്ടാക്കുന്ന അഡെനോവൈറസിന് ജനിതക പരിവര്ത്തനം വരുത്തിയാണ് ഓക്സ്ഫഡ് വാക്സീന് വികസിപ്പിച്ചത്. മൃഗങ്ങളിലെ പരീക്ഷണം വിജയകരമായതിനു പിന്നാലെയാണ് മനുഷ്യരിലെ പരീക്ഷണം ആരംഭിച്ചത്. ആദ്യ 2 ഘട്ടങ്ങള് വിജയകരമായെന്നു വ്യക്തമാക്കി ലാന്സെറ്റ് മെഡിക്കല് ജേണലില് പ്രബന്ധം പ്രസിദ്ധീകരിച്ചിരുന്നു. 1077 പേര്ക്കാണ് രണ്ടാം ഘട്ടത്തില് സാധ്യതാ വാക്സിന് നല്കിയത്. ഇവരില് 90% പേരിലും വൈറസിനെതിരെ ആന്റിബോഡികളും ടി കോശങ്ങളും രൂപപ്പെട്ടിരുന്നു. ഗുരുതര പാര്ശ്വഫലങ്ങളുമില്ലായിരുന്നു. തുടര്ന്നാണ് അവസാന ഘട്ട പരീക്ഷണം നടത്തിയത്.
വാക്സിന് കുത്തിവെച്ച വൊളന്റിയര്മാരില് ഒരാള്ക്ക് പ്രതികൂല ഫലം ബാധിച്ചതിനാലാണ് പരീക്ഷണം നിര്ത്തുന്നതെന്ന് കമ്പനി അറിയിച്ചു. രോഗം വാക്സിന്റെ പാര്ശ്വഫലമെന്ന് സംശയം ഉയര്ന്നിട്ടുണ്ട്. ബ്രിട്ടീഷ് ബഹുരാഷ്ട്ര മരുന്ന് കമ്പനിയായ അസ്ട്ര സെനേക്കയുമായി ചേര്ന്ന് വികസിപ്പിച്ച വാക്സിന്റെ മൂന്നാംഘട്ട പരീക്ഷണമാണ് നിര്ത്തിയത്.
പരീക്ഷണം നിലച്ചതില് ആശങ്കപ്പെടേണ്ടെന്നും സാധാരണ നടപടിക്രമം മാത്രമെന്നും അസ്ട്രസെനേക അറിയിച്ചു. പാര്ശ്വഫലമെന്ന് സംശയിക്കുന്ന രോഗം പഠിച്ചശേഷം പരീക്ഷണം തുടരും. പരീക്ഷണത്തില് പങ്കെടുക്കുന്ന സന്നദ്ധപ്രവര്ത്തകരുടെ സുരക്ഷ പ്രധാനമാണെന്നും കമ്പനി വിശദീകരിച്ചു. വാര്ത്ത പുറത്തു വന്നതോടെ അസ്ട്രസെനേകയുടെ ഓഹരികളില് വന് ഇടിവാണ് രേഖപ്പെടുത്തിയത്.
പ്രവാസികൾക്കും അവരുമായി ബന്ധപ്പെടുന്നവർക്കും ഉപകാരപ്രദമായേക്കാവുന്ന വാർത്തകളാണ് ഗർഷോം ഓൺലൈനിലൂടെ പ്രസിദ്ധീകരിക്കുന്നത്. വാർത്തകളുമായി ബന്ധമില്ലാത്ത കമെന്റുകൾ ഇവിടെ ഉൾപ്പെടുത്തുവാൻ കഴിയില്ല. വായനക്കാർ ദയവായി സഹകരിക്കുക.