ഗർഷോം
ദോഹ: ഖത്തറിലെ ഹമദ് രാജ്യാന്തര വിമാനത്താവളത്തില് യാത്രക്കാരുടെ സുരക്ഷക്കായി പുതിയ സെക്യൂരിറ്റി റോബോട്ട് അവതരിപ്പിച്ചു. കാഴ്ചയില് ഒരു സ്കൂട്ടറാണെന്നു തോന്നിക്കുന്ന ഈ സെക്യൂരിറ്റി റോബോട്ട് സംശയാസ്പദമായ വ്യക്തികളെ മുതല് കള്ളനോട്ടുകള് വരെ കണ്ടെത്താനാവുന്നതാണ്. ഖത്തറില് തന്നെ വികസിപ്പിച്ചെടുത്തതാണ് ഈ റോബോട്ട്. ആഭ്യന്തരമന്ത്രാലയത്തിന്റെയും ലഖ്വിയയുടെയും സംയുക്ത സംരംഭമാണിത്.
അറൈവല് ടെര്മിനലില് നിലയുറപ്പിക്കുന്ന റോബോട്ട് ആവശ്യമെങ്കില് ഡിപ്പാര്ച്ചറിലും വിമാനത്താവളത്തിലുടനീളവും കറങ്ങി നടക്കും. 100 മീറ്റര് ദൂരെ നിന്നു തന്നെ സംശയാസ്പദമായ വ്യക്തികളെയും ബാഗേജുകളെയും തിരിച്ചറിയാനാവുമെന്നതാണ് ഇതിന്റെ പ്രധാന സവിശേഷത. കള്ളനോട്ടുകള് നിരോധിത വസ്തുക്കള് എന്നിവ കണ്ടെത്തുന്നതോടൊപ്പം യാത്രക്കാരുടെ ഹൃദയമിടിപ്പും വിരലടയാളവും മനസിലാക്കി പ്രവര്ത്തിക്കാനും റോബോട്ടിനാവും.
ആഭ്യന്തര മന്ത്രാലയവും ലഖ്വിയയും സംയുക്തമായി നടപ്പിലാക്കുന്ന സെക്യൂരിറ്റി റോബോട്ട് ലഖ്വിയയിലെ കമാണ്ടര് ഓഫ് സെക്യൂരിറ്റി മേജര് അലി ഹസന് അല് റാഷിദ് 7 മാസം കൊണ്ടാണ് വികസിപ്പിച്ചെടുത്തത്. യാത്രക്കാര്ക്ക് ലളിതമായ നടപടികളിലൂടെ എമിഗ്രേഷന് പൂര്ത്തിയാക്കാവുന്ന ഇ ഗേറ്റ് ഉള്പ്പെടെയുള്ള സംവിധാനങ്ങളുടെ തുടര്ച്ച കൂടിയാണിത്.
പ്രവാസികൾക്കും അവരുമായി ബന്ധപ്പെടുന്നവർക്കും ഉപകാരപ്രദമായേക്കാവുന്ന വാർത്തകളാണ് ഗർഷോം ഓൺലൈനിലൂടെ പ്രസിദ്ധീകരിക്കുന്നത്. വാർത്തകളുമായി ബന്ധമില്ലാത്ത കമെന്റുകൾ ഇവിടെ ഉൾപ്പെടുത്തുവാൻ കഴിയില്ല. വായനക്കാർ ദയവായി സഹകരിക്കുക.