ഗർഷോം
കുവൈത്ത് സിറ്റി: പാകിസ്ഥാന് ഉള്പ്പെടെ ആറു രാജ്യങ്ങളില് നിന്നുള്ളവര്ക്ക് സന്ദര്ശന വിസ ലഭിക്കാന് ആഭ്യന്തരമന്ത്രിയുടെ പ്രത്യേകാനുമതി കുവൈത്ത് നിര്ബന്ധമാക്കി. വിവിധ ഗവര്ണറേറ്റുകളിലെ താമസകാര്യവകുപ്പ് ഓഫീസുകള്ക്ക് ആഭ്യന്തര മന്ത്രാലയം അയച്ച സര്ക്കുലറിലാണ് പുതിയ നിബന്ധന വ്യക്തമാക്കുന്നത്.
പാക്കിസ്ഥാന് പുറമെ ബംഗ്ലാദേശ്, സിറിയ, യമന്, ഇറാഖ്, ഇറാന് എന്നീ രാജ്യക്കാര്ക്കാണ് വിസ അനുവദിക്കുന്നതില് പുതിയ നിബന്ധന ഏര്പ്പെടുത്തിയത്. ഈ രാജ്യക്കാര്ക്ക് സന്ദര്ശക വിസ അപേക്ഷകളില് ആഭ്യന്തരമന്ത്രിയുടെ പ്രത്യേക അനുമതി ഇല്ലാതെ വിസ അനുവദിക്കരുതെന്നാണ് നിര്ദേശം. തൊഴില് വിസ അനുവദിക്കുന്നതില് ഈ രാജ്യക്കാര്ക്കു നേരത്തെ തന്നെ നിയന്ത്രണമേര്പ്പെടുത്തിയിരുന്നു. സുരക്ഷാ കാരണങ്ങള് മുന്നിര്ത്തിയാണ് നിയന്ത്രണം.
ഈ രാജ്യങ്ങളില് നിലനില്ക്കുന്ന രാഷ്ട്രീയ അസ്ഥിരതയാണ് നിയന്ത്രണത്തിന് കാരണമെന്നും സുരക്ഷാ സാഹചര്യം മെച്ചപ്പെടുമ്പോള് നിയന്ത്രണം പിന്വലിക്കുമെന്നുമാണ് ആഭ്യന്തര മന്ത്രാലയത്തിന്റെ വിശദീകരണം. അതേസമയം നിലവില് കുവൈത്തിലുള്ളവര്ക്കു താമസാനുമതി പുതുക്കുന്നതിന് തടസ്സമുണ്ടാകില്ല.
പ്രവാസികൾക്കും അവരുമായി ബന്ധപ്പെടുന്നവർക്കും ഉപകാരപ്രദമായേക്കാവുന്ന വാർത്തകളാണ് ഗർഷോം ഓൺലൈനിലൂടെ പ്രസിദ്ധീകരിക്കുന്നത്. വാർത്തകളുമായി ബന്ധമില്ലാത്ത കമെന്റുകൾ ഇവിടെ ഉൾപ്പെടുത്തുവാൻ കഴിയില്ല. വായനക്കാർ ദയവായി സഹകരിക്കുക.