ഗർഷോം
കുവൈത്ത് സിറ്റി: കുവൈത്തില് സ്വദേശി പാര്പ്പിടമേഖലകളിലെ ബാച്ച്ലര് താമസക്കാര്ക്കെതിരെയുള്ള നടപടികള് റമദാന് കഴിയുന്നത് വരെ നിര്ത്തി. റമദാനില് ഇവിടങ്ങളിലേക്കുള്ള വൈദ്യുതി വിതരണം തടയില്ലെന്ന് വൈദ്യുതി മന്ത്രാലയവും വ്യക്തമാക്കിയിട്ടുണ്ട്. റമദാന് മാസം കഴിയുന്നതോടെ പരിശോധനകളുള്പ്പെടെ വ്യാപകമാക്കാനാണ് മുനിസിപ്പാലിറ്റിയുടെ പദ്ധതി.
മുനിസിപ്പല് കാര്യ മന്ത്രി ഫഹദ് അല് ശുഹലയുടെ നിര്ദേശപ്രകാരമാണ് ബാച്ലര്മാര്ക്കെതിരെയുള്ള നടപടികള് താല്ക്കാലികമായി നിര്ത്തിയത്. മുനിസിപ്പാലിറ്റിക്ക് പുറമെ വൈദ്യുതി മന്ത്രാലയം, ആഭ്യന്തര മന്ത്രാലയം എന്നിവയിലെ ഉദ്യോഗസ്ഥര് കൂടി ഉള്പ്പെടുന്ന സംഘമാണ് ബാച്ച്ലര് താമസക്കാരെ കണ്ടെത്തുന്നതിനായി പരിശോധന നടത്തിവരുന്നത്. മെയ് ആദ്യ വാരം നടത്തിയ പരിശോധനയില് ഹവല്ലി, ഫര്വാനിയ, അഹ്മദി എന്നീ ഗവര്ണ്ണറേറ്റുകളിലെ 15ഓളം കെട്ടിടങ്ങളിലേക്കുള്ള വൈദ്യുതിബന്ധം വിച്ഛേദിച്ചിരുന്നു.
സ്വദേശി താമസ മേഖലകളില് വിദേശി ബാച്ചിലര്മാര്ക്ക് താമസം അനുവദിക്കുന്നതിനെതിരെ പരാതികള് വ്യാപകമായതോടെയാണ് അധികൃതര് ശക്തമായ നടപടികള് ആരംഭിച്ചത്.
പ്രവാസികൾക്കും അവരുമായി ബന്ധപ്പെടുന്നവർക്കും ഉപകാരപ്രദമായേക്കാവുന്ന വാർത്തകളാണ് ഗർഷോം ഓൺലൈനിലൂടെ പ്രസിദ്ധീകരിക്കുന്നത്. വാർത്തകളുമായി ബന്ധമില്ലാത്ത കമെന്റുകൾ ഇവിടെ ഉൾപ്പെടുത്തുവാൻ കഴിയില്ല. വായനക്കാർ ദയവായി സഹകരിക്കുക.