ഗർഷോം അവാർഡുകൾ നാളെ പ്രഖ്യാപിക്കും

ബാംഗ്ലൂർ: പതിനൊന്നാമതു ഗർഷോം അവാർഡുകൾ നാളെ പ്രഖ്യാപിക്കും. ഹാബിറ്റാറ്റ് ഫോർ ഹ്യൂമാനിറ്റി ഇന്റർനാഷണൽ ഏഷ്യ പസഫിക് ഡയറക്ടർ ജോസഫ് സ്കറിയ ചെയർമാനായ സമിതിയാണ് അവാർഡ് ജേതാക്കളെ തിരഞ്ഞെടുത്തത്. സ്വപ്രയത്നത്തിലൂടെ മറുനാട്ടിൽ ജീവിതവിജയം നേടുകയും ജീവകാരുണ്യപ്രവർത്തനങ്ങളിൽ ഏർപ്പെടുകയും ചെയ്യുന്ന പ്രവാസി മലയാളികളെ ആദരിക്കുവാൻ ബാംഗ്ലൂർ ആസ്ഥാനമായ ഗർഷോം ഫൗണ്ടേഷനാണ് 2003 മുതൽ ഗർഷോം അവാർഡുകൾ ഏർപ്പെടുത്തിയത്. ശില്പവും പ്രശസ്തിപത്രവും അടങ്ങുന്ന അവാർഡ് അടുത്ത ശനിയാഴ്ച വൈകുന്നേരം ആറിന് മലേഷ്യയിലെ മലാക്ക കൾച്ചറൽ സെന്ററിൽ നടക്കുന്ന ത്രിവേണി സംഗമത്തിൽ വിതരണം ചെയ്യും.

ഓൾ മലേഷ്യ മലയാളി അസോസിയേഷന്റെ നേതൃത്വത്തിൽ മലാക്ക കേരള സമാജം, മലേഷ്യൻ മലയാളി ഹിന്ദു പരിഷത് എന്നി സംഘടനകളാണ് പതിനൊന്നാമത് ഗർഷോം അവാർഡുദാന ചടങ്ങിന് ആഥിത്യമരുളുന്നത്. ത്രിവേണി സംഗമത്തിന്റെ ഭാഗമായി ശനിയാഴ്ച ഉച്ചകഴിഞ്ഞു രണ്ടു മുതൽ അഖില മലേഷ്യ തിരുവാതിരകളി മത്സരം നടക്കും. തുടർന്ന് മലാക്ക കേരള സമാജത്തിന്റെ നേതൃത്വത്തിൽ നടക്കുന്ന ക്രിസ്മസ് ഷോയിൽ വിവിധ കലാപരിപാടികൾ അരങ്ങേറും.

അമ്മ ചെയർപേഴ്സൺ സുശീല മേനോൻ, ഓർഗനൈസിങ് കമ്മിറ്റി ചെയർമാൻ ഡോ. രാഘവൻ നമ്പ്യാർ, മലാക്ക കേരള സമാജം പ്രസിഡന്റ് ഡോ. ജയശങ്കർ എന്നിവരുടെ നേതൃത്വത്തിൽ ചടങ്ങുകൾക്ക് വിപുലമായ ഒരുക്കങ്ങൾ നടന്നു വരുന്നു.