ഓസ്ട്രിയൻ പ്രസിഡന്റ് തെരെഞ്ഞെടുപ്പ്; അലക്സാണ്ടര്‍ വാന്‍ ദെര്‍ ബെലന് ജയം

വിയന്ന: ഓസ്ട്രിയൻ പ്രസിഡന്റ് തെരെഞ്ഞെടുപ്പിൽ ഗ്രീൻ പാർട്ടി പിന്തണ്ണയോടെ മത്സരിച്ച അലക്സാണ്ടര്‍ വാന്‍ ദെര്‍ ബെലന് ജയം. കുടിയേറ്റ വിരുദ്ധ, യൂറോപ്യൻ യൂണിയൻ വിരുദ്ധ നയങ്ങൾ കൊണ്ട് ശ്രദ്ധേയനായ തീവ്രവലതുപക്ഷ നേതാവ് നോബര്‍ട്ട് ഹോഫറിനെയാണ് തെരെഞ്ഞെടുപ്പിൽ ജനങ്ങൾ തള്ളിക്കളഞ്ഞത്. തോല്‍വി അംഗീകരിക്കുന്നുവെന്ന് ഹോഫറും ഫ്രീഡം പാര്‍ട്ടി നേതൃത്വവും അറിയിച്ചിട്ടുണ്ട്.

ഏറെ ആകാശയോടെയാണ് യൂറോപ്യൻ യൂണിയൻ ഓസ്ട്രിയൻ തെരെഞ്ഞെടുപ്പിനെ നോക്കിക്കണ്ടത്. ഹോഫർ ജയിക്കുമെന്നായിരുന്നു നേരത്തെ പുറത്തുവന്ന വിവിധ സർവ്വേഫലങ്ങൾ നൽകിയ സൂചന. അമേരിക്കൻ തെരെഞ്ഞെടുപ്പിൽ സമാന ആശയങ്ങൾ വെച്ചു പുലർത്തുന്ന ട്രംപിന്റെ വിജയവും ഇക്കാര്യത്തിനു സാധ്യത കൽപ്പിക്കുന്നതായിരുന്നു. 

ഗ്രീന്‍ പാര്‍ട്ടി പിന്തുണയോടെ സ്വതന്ത്രനായി മത്സരിച്ച അലക്സാണ്ടര്‍ വാന്‍ ദെര്‍ ബെല്ലന്‍ 53.6 ശതമാനം വോട്ടുനേടിയതായാണ് ഒടുവിൽ കിട്ടുന്ന റിപ്പോർട്ട്. ഹോഫറിന് 46.4 ശതമാനം വോട്ടാണ് നേടാനായത്. ഔദ്യോഗിക ഫലപ്രഖ്യാപനം ഇന്നുണ്ടാകുമെന്നാണ് കണക്കാക്കപ്പെടുന്നത്.