യുഎഇയില്‍ നിന്നുള്ള പണമൊഴുക്കില്‍ മുന്നില്‍ ഇന്ത്യ

അബൂദബി: കഴിഞ്ഞ വര്‍ഷം യുഎഇയില്‍ നിന്ന് ഏറ്റവുമധികം പണം നാട്ടിലേക്കയച്ചത് ഇന്ത്യക്കാര്‍. യുഎഇ സെന്‍ട്രല്‍ ബാങ്കിന്റെ റിപ്പോര്‍ട്ടിലാണ് ഇക്കാര്യം വ്യക്തമാക്കിയത്. യുഎഇയില്‍ നിന്നു വിവിധ രാജ്യങ്ങളിലേക്ക് അയച്ചിട്ടുള്ള 169.2 ബില്യണ്‍ ദിര്‍ഹത്തില്‍ 38.1% പോയത് ഇന്ത്യയിലേക്കാണ്.

യുഇയിലെ ഇന്ത്യക്കാരുടെ വര്‍ധിച്ച സാന്നിധ്യവും ഇന്ത്യന്‍ രൂപയുടെ വിലയിടിവുമാണ് ഇതിനു കാരണമായി ബാങ്ക് ചൂണ്ടിക്കാട്ടുന്നത്. 20 ലക്ഷത്തോളം ഇന്ത്യക്കാരാണ് യുഎഇയില്‍ ഉള്ളത്. ജനസംഖ്യയുടെ ഏതാണ്ട് 28%. ഇന്ത്യയ്ക്കു പിന്നാലെ രണ്ടാം സ്ഥാനത്ത് പാകിസ്ഥാനാണ് 9.5%. ഫിലിപ്പീന്‍സ്(7.2%), ഈജിപ്ത്(5.3%), യുഎസ്(3.9%), യുകെ(3.7%) എന്നിങ്ങനെയാണ് കണക്കുകള്‍.

2017നെക്കാള്‍ 3%കൂടുതലാണ് യുഎഇയില്‍ നിന്ന് വിവിധ രാജ്യങ്ങളിലേക്ക് അയച്ച തുക. 2017ല്‍ 164.4 ബില്യണ്‍ ദിര്‍ഹമാണ് പുറത്തേക്ക് അയച്ചത്. ബാങ്കുകളെക്കാള്‍ എക്‌സ്‌ചേഞ്ച് സ്ഥാപനങ്ങളിലൂടെയാണ് കൂടുതല്‍ തുക അയച്ചിട്ടുള്ളതെന്നും കണക്കുകള്‍ വ്യക്തമാക്കുന്നു.