വ്യാജ എഞ്ചിനീയറിംങ് സര്‍ട്ടിഫിക്കറ്റ്: ഇരുപത്തി മൂന്ന് ഇന്ത്യക്കാരെ നാടുകടത്തി

റിയാദ്: വ്യജ എഞ്ചിനീയറിംങ് സര്‍ട്ടിഫിക്കറ്റ് ഹാജരാക്കിയ ഇരുപത്തി മൂന്ന് ഇന്ത്യക്കാരെ സൗദി അറേബ്യയില്‍ നിന്നും നാടുകടത്തി. സൗദി കൗണ്‍സില്‍ ഓഫ് എഞ്ചിനീയേഴ്‌സിന്റെ നിര്‍ദേശ പ്രകാരം പിഴ ചുമത്തിയാണ് നടപടി സ്വീകരിച്ചത്. സൗദി കൗണ്‍സില്‍ ഓഫ് എഞ്ചിനീയേഴ്‌സ് പുറത്ത് വിട്ട വിവരങ്ങള്‍ പ്രകാരം കഴിഞ്ഞ ആറ് മാസങ്ങളില്‍ നടന്ന പരിശോധനയില്‍ നൂറ്റി നാല്‍പത് വ്യാജ എഞ്ചിനീയറിംങ് സര്‍ട്ടിഫികറ്റുകളാണ് കണ്ടെത്തിയിട്ടുള്ളത്. ഇതില്‍ ഇരുപത്തി മൂന്നെണ്ണം ഇന്ത്യാക്കാരുടേതാണ്. ഭൂരിപക്ഷവും വന്‍കിട വ്യവസായ സ്ഥാപനങ്ങളില്‍ ജോലി ചെയ്യുന്ന തൊഴിലാളികളുടെതാണ്. വിദേശ തൊഴിലാളികളുടെ യോഗ്യതാ സര്‍ട്ടിഫിക്കറ്റുകള്‍ വ്യവസായ മന്ത്രാലയം സൂക്ഷമ പരിശോധനയ്ക്ക് വിധേയമാക്കാന്‍ തുടങ്ങിയതോടെ ഈ മേഖലയിലുള്ള നിരവധി പേര്‍ക്ക് ജോലി നഷ്ടമായിട്ടുണ്ട്.

വ്യാജ അറ്റസ്റ്റേഷന്‍ നടത്തിയതിന്റെ പേരിലും പലര്‍ക്കും ജോലി നഷ്ടമായിട്ടുണ്ട്. ഇതില്‍ ഭൂരിഭാഗവൂം കേരളത്തിന് പുറത്ത് ഹൈദരാബാദ്, പൂനെ, ചെന്നൈ, ബാംഗ്ലൂര്‍ എന്നിവിടങ്ങളിലെ സഥാപനങ്ങളില്‍ പഠിച്ചവരാണ്. വ്യാജ സര്‍ട്ടിഫിക്കറ്റുമായി പിടിക്കപ്പെടുന്നവര്‍ക്കെതിരെ ക്രിമിനല്‍ കുറ്റം ചുമത്തി വിചാരണ ചെയ്യണമെന്ന് ഇതിനകം കൗണ്‍സില്‍ ഓഫ് എഞ്ചിനീയേഴ്‌സ് സര്‍ക്കാരിന് ശുപാര്‍ശ നല്‍കിയിട്ടുണ്ട്.

ഏതു ജോലിക്കാണോ സൗദിയിലേക്ക് വരുന്നത്, അതിനുള്ള യോഗ്യതാ പരീക്ഷ നടപ്പിലാക്കണം എന്നും ശൂറാ കൗണ്‍സില്‍ തൊഴില്‍ മന്ത്രാലയത്തോട് ആവശ്യപ്പെട്ടിട്ടുണ്ട്. അതുപോലെ വ്യാജ പ്രവൃത്തി പരിചയ സര്‍ട്ടിഫിക്കറ്റ് ഹാജരാക്കുന്നവര്‍ക്കെതിരെയും കടുത്ത ശിക്ഷ നടപടി സ്വീകരിക്കണമെന്ന് കൗണ്‍സില്‍ ഓഫ് ചേംബേഴ്‌സ് തൊഴില്‍ മന്ത്രാലയത്തോട് ആവശ്യപ്പെട്ടിട്ടുണ്ട്.