ശൈത്യകാല ടെന്റുകളില്‍ ഹീറ്റര്‍ ഉപയോഗം ശ്രദ്ധിച്ചുവേണമെന്ന് മുന്നറിയിപ്പ്

കുവൈത്ത്‌സിറ്റി: കുവൈത്തില്‍ ശൈത്യകാല ടെന്റുകളില്‍ ഹീറ്റര്‍ ഉപയോഗം ശ്രദ്ധിച്ചുവേണമെന്ന് അഗ്‌നിശമന സേന വിഭാഗം മുന്നറിയിപ്പ് നല്‍കി. അഗ്‌നിശമന സേന വാര്‍ത്താവിനിമയ വിഭാഗം തലവന്‍ ലെഫ്റ്റനന്റ് അലി ഖാലിയുടെതാണ് അറിയിപ്പ്. കഴിഞ്ഞ ദിവസം ജഹ്‌റയില്‍ ശൈത്യകാല ടെന്റിന് തീപിടിച്ചുണ്ടായ അപകടത്തില്‍ ഒരു കുട്ടി മരിച്ചിരുന്നു. ഇതേ തുടര്‍ന്നാണ് അഗ്‌നിശമനവിഭാഗത്തിന്റെ മുന്നറിയിപ്പ്.

ടെന്റുകളില്‍ മതിയായ വായുസഞ്ചാരം ഉറപ്പു വരുത്തണമെന്നും വസ്ത്രങ്ങള്‍ ഹീറ്ററിനരികില്‍ വെക്കരുതെന്നും നിര്‍ദേശമുണ്ട്. ഹീറ്ററുകളില്‍ ഇന്ധനമായി ഉപയോഗിക്കുന്ന കാര്‍ബണ്‍ മോണോക്‌സൈഡ് വിഷവാതകമാണ്. അമിത അളവില്‍ ഇത് ഉള്ളിലത്തെിയാല്‍ മരണം വരെ സംഭവിക്കാം. ഇത് തടയാന്‍ ടെന്റുകളില്‍ വായു സഞ്ചാരം ഉറപ്പുവരുത്തണമെന്നു കെഎഫ്എസ്ഡി പബ്ലിക് റിലേഷന്‍ ഹെഡ് ലെഫ്റ്റനന്റ് അലി ഖാലി നിര്‍ദേശിച്ചു.

തീ കൂട്ടിയിട്ട് ചൂടുകൊള്ളുമ്പോഴും പടരാതിരിക്കാന്‍ ജാഗ്രത വേണം. കാമ്പിങ് സീസണ്‍ കണക്കിലെടുത്തു ആഭ്യന്തര മന്ത്രാലയം പ്രത്യേക എമര്‍ജന്‍സി വിഭാഗത്തിന് രൂപം നല്‍കിയിട്ടുണ്ട്. സുരക്ഷ, ആരോഗ്യം, ഗൈഡന്‍സ് എന്നിവ നല്‍കുന്നതിനായാണ് 24 മണിക്കൂറും പ്രവര്‍ത്തിക്കുന്ന പോലീസ് സെല്‍ ഒരുക്കിയത് ടെന്റ് കൂടുതലുള്ള പ്രദേശങ്ങളില്‍ രാത്രിയും പകലും ഇടവിട്ട് സുരക്ഷാ പട്രോള്‍ സംഘങ്ങള്‍ നിരീക്ഷണം നടത്തുന്നുമുണ്ട്.