കുവൈറ്റിൽ വാണിജ്യാവശ്യത്തിനുള്ള കെട്ടിടങ്ങൾക്ക് ഇന്നുമുതൽ പുതുക്കിയ വൈദ്യുതി നിരക്ക്

കുവൈറ്റ് സിറ്റി: വാണിജ്യാവശ്യത്തിനു ഉപയോഗിക്കുന്ന കെട്ടിടങ്ങൾക്കു ഇന്നുമുതൽ പുതിയ വൈദ്യുതി നിരക്ക് നിലവിൽ വരുമെന്നു വൈദ്യുത-ജല മന്ത്രാലയം (എംഇഡബ്ലിയു) അറിയിച്ചു. പഴയ നിരക്കുകൾ പ്രകാരമുള്ള ബില്ലുകൾ അടച്ചെന്ന് ഉറപ്പുവരുത്തണമെന്നു കെട്ടിട ഉടമകളോടും ഷോപ്പ് ഉടമകളോടും  എംഇഡബ്ലിയു  ഉപഭോക്തവിഭാഗം മേധാവി സലിം അൽ-ഖസബ നിർദേശിച്ചിട്ടുണ്ട്. 

പഴയ നിരക്ക് പ്രകാരമുള്ള ബില്ലുകൾ അടയ്ക്കാത്ത പക്ഷം പുതിയ നിരക്കുമായി അവ കൂടിക്കലരാൻ സാധ്യതയുണ്ട്. അതിനാൽ ഇക്കാര്യം ബോധ്യപ്പെടുത്തുന്നതിനായി അൽ-ഹമ്ര ടവറിൽ ബോധവത്കരണ ക്യാമ്പെയിൻ നടത്തുന്നുണ്ട്. 

ആഗസ്റ്റ് 22 മുതൽ ഇൻവെസ്റ്റ്മെന്റ് റെസിഡൻഷ്യൽ ബിൾഡിംഗുകൾക്കും പുതിയ വൈദ്യുതി നിരക്കുകൾ നിലവിൽ വരും. ഇത്തരം കെട്ടിടങ്ങളിലാണു പ്രവാസികളിൽ കൂടുതൽ പേരും താമസിക്കുന്നത്.