ഗൾഫ് രാജ്യങ്ങളിലെ മൂന്നിൽ രണ്ട് കമ്പനികളും പുതിയ ജീവനക്കാരെ നിയമിക്കാനൊരുങ്ങുന്നു

മിഡിൽ ഈസ്റ്റ് ആൻഡ് നോർത്ത് ആഫ്രിക്കൻ മേഖലയിലെ മൂന്നിൽ രണ്ട് തൊഴിൽ ദാതാക്കളും ഈ വർഷം പുതിയ ജീവനക്കാരെ നിയമിക്കാൻ ഒരുങ്ങുന്നു. ഗൾഫ് മേഖലയിലെ മുൻനിര ജോബ് വെബ്സൈറ്റായ bayt.com, കൺസൾട്ടിംഗ് ഗ്രൂപ്പായ YouGov എന്നിവർ ചേർന്ന് തയ്യാറാക്കിയ മിഡിൽ ഈസ്റ്റ് ജോബ് ഇൻഡക്സ് സർവ്വേയിലാണ് ഈ കണ്ടെത്തൽ.

വരുന്ന മൂന്ന് മാസത്തിനുള്ളിൽ മേഖലയിലെ 51 ശതമാനം തൊഴിൽദാതാക്കളും പുതിയതായി ജീവനക്കാരെ നിയമിക്കും. ഇതിൽ 41 ശതമാനം നിയമനവും ജൂനിയർ എക്സിക്യൂട്ടീവ് തസ്തികയിലായിരിക്കും. 27 ശതമാനം പേർക്ക് കോർഡിനേറ്റർ തസ്തികയിലും 26 ശതമാനം പേർക്ക് മാനേജർ തസ്തികയിലും ഇക്കാലയളവിൽ തൊഴിൽ ലഭിക്കും.

41 ശതമാനം കമ്പനികൾ ചുരുങ്ങിയത് 4 പേരെയെങ്കിലും പുതിയതായി നിയമിക്കും. സ്വകാര്യമേഖലയിലെ കമ്പനികളാണ് കൂടുതലായും പുതിയ ഉദ്യോഗാർത്ഥികളെ തേടുന്നത്. 54 ശതമാനം പ്രാദേശിക കമ്പനികളും 52 ശതമാനം മൾട്ടിനാഷണൽ കമ്പനികളും വരുന്ന മൂന്ന് മാസത്തിനുള്ളിൽ പുതിയ നിയമനം നടത്തുമെന്നാണ് സർവ്വേഫലം.