ബഹ്റൈനിൽ പരാതികൾ സമർപ്പിക്കാൻ ഏർപ്പെടുത്തിയ ആപ്പ് സംവിധാനം വിജയകരം

മനാമ: രാജ്യത്ത് പരാതികളും നിർദ്ദേശങ്ങളും സമർപ്പിക്കുന്നതിന് ഏർപ്പെടുത്തിയ മൊബൈൽ ആപ്ലിക്കേഷൻ സംവിധാനം വിജയകരമെന്ന് അധികൃതർ. തവസൂൽ എന്ന പേരിലുള്ള നാഷണൽ സജഷൻസ് ആന്റ് കംപ്ലയിന്റ് സംവിധാനത്തിലാണ് ജി.പി.എസ്സുമായി ബന്ധിപ്പിച്ചിട്ടുള്ള മൊബൈൽ അപ്ലിക്കേഷൻ ലഭ്യമാക്കിയിരിക്കുന്നത്.

ആൻഡ്രോയിഡ്, ആപ്പിൾ ഫോണുകളിൽ bahrain.bh/apps എന്ന ആപ് സ്റ്റോറിൽ നിന്ന് തവസൂൽ ആപ്ലിക്കേഷൻ ഡൗൺലോഡ് ചെയ്യാം. ഇതുവഴി ജനങ്ങൾക്ക് പരാതികളും നിർദ്ദേശങ്ങളും എളുപ്പത്തിൽ സമർപ്പിക്കാം. പൊതുസേവനങ്ങളുടെ നിലവാരം ഉയർത്തുന്നതിന് ഈ ആപ്പ് പ്രയോജനമായിട്ടുണ്ടെന്ന് ഇൻഫർമേഷൻ ആന്റ് ഇ-ഗവൺമെന്റ് അതോറിറ്റി ചീഫ് എക്സിക്യുട്ടീവ് മുഹമ്മദ് അലി അൽഖ ഈദ് പറഞ്ഞു.

2014 ൽ ആണ് ആപ്പ്ലിക്കേഷൻ നിലവിൽ വന്നത്. ഇതുവരെ 22000 നിർദ്ദേശങ്ങളും പരാതികളും ഈ ആപ്ലിക്കേഷൻ വഴി ലഭിച്ചതായി അധികൃതർ അറിയിച്ചു. ജി.പി.എസുമായി ബന്ധപ്പെടുത്തിയിട്ടുള്ളതിനാൽ പരാതികൾ ഏത് സ്‌ഥലത്ത് നിന്നാണ് അയക്കുന്നതെന്നുള്ള കാര്യവും മനസ്സിലാക്കാനാകും. ഉപഭോക്താക്കളുടെ വ്യക്തിപരമായ വിവരങ്ങൾ സൂക്ഷിക്കാനും ആപ്പിൽ സൗകര്യമുണ്ട്.