5 വർഷത്തെ വിസയിൽ മാതാപിതാക്കളെ ഓസ്ട്രേലിയയിലേക്ക് കൊണ്ടുവരാൻ അവസരമൊരുങ്ങുന്നു

സിഡ്നി: ഓസ്ട്രേലിയയിലെ കുടിയേറ്റക്കാർക്ക് തങ്ങളുടെ മാതാപിതാക്കളെ അഞ്ച് വർഷത്തെ താൽക്കാലിക വിസയിൽ രാജ്യത്തേക്ക് കൊണ്ടുവരാനുള്ള അവസരമൊരുങ്ങുന്നു. നിലവിൽ ഒരു വർഷത്തെ വിസ മാത്രമാണു താൽക്കാലികമായി ലഭിക്കുകയുള്ളൂ. ഇതിൽ കൂടുതൽ രാജ്യത്ത് തങ്ങണമെങ്കിൽ കൂടുതൽ തുക നൽകി കോണ്ട്രിബ്യൂട്ടറി വിസയെടുക്കേണ്ടതായിട്ടുണ്ട്.

കുടിയേറ്റകാര്യ സഹമന്ത്രി അലക്സ് ഹോക്ക് ആണു ഇക്കാര്യം അറിയിച്ചത്. പെർമനന്റ് വിസയ്ക്ക് കുടിയേറ്റക്കാർക്ക് വർഷങ്ങൾ കാത്തിരിക്കേണ്ടി വരുന്ന സാഹചര്യമാണുള്ളതെന്നും അതിനാലാണു ഈ തീരുമാനമെന്നും അദ്ദേഹം കൂട്ടിച്ചേർത്തു.

അതിനിടെ നിലവിൽ 50,000 ഡോളറോളം നൽകി എടുക്കുന്ന കോണ്ട്രിബ്യുട്ടറി പേരന്റ് വിസയുടെ ഫീസ് വർധിപ്പിക്കാൻ പ്രൊഡക്റ്റിവിറ്റി കമ്മീഷൻ സർക്കാറിനോട് ശുപാർശ ചെയ്തിട്ടുണ്ട്. 410,000 ഡോളർ വരെ രാജ്യത്തെത്തുന്ന പ്രായമേറിയ വ്യക്തികൾക്ക് വേണ്ടി വെൽഫെയർ പദ്ധതികളിലൂടെ ചെലവഴിക്കേണ്ടി വരുന്നുണ്ടെന്നും അതിനാൽ കോണ്ട്രിബ്യൂട്ടറി പേരന്റ് വിസ ഫീസ് വർധിപ്പിക്കണമെന്നുമാണു നിർദേശം.