പേമാരിയിലും വെള്ളപ്പൊക്കത്തിലും ന്യൂസൗത്ത് വെയിൽസിന്റെ വടക്കൻ മേഖല ഒറ്റപ്പെട്ടു

സിഡ്നി: കനത്ത പേമാരിയും വെള്ളപ്പൊക്കവും മൂലം ന്യൂ സൗത്ത് വെയിൽസിന്റെ വടക്കൻ മേഖല തീർത്തും ഒറ്റപ്പെട്ടു. പുറം ലോകവുമായുള്ള ബന്ധം വിഛേദിക്കപ്പെട്ട് നാലായിരത്തിലധികം ജനങ്ങൾ ഇവിടെ അകപ്പെട്ടിരിക്കുകയാണ്. ഈ മേഖലയിലെ 11 നദികളും കരകവിഞ്ഞാണ് ഒഴുകുന്നത്. സംസ്ഥാനത്തിലെ ഭൂരിഭാഗം പ്രദേശങ്ങളിലും കാലാവസ്ഥ കൂടുതൽ മോശമാകുമെന്നും കനത്ത പേമാരിക്കു സാധ്യതയെന്നും കാലാവസ്ഥ നിരീക്ഷകർ മുന്നറിയിപ്പു നൽകി.

സംസ്ഥാന അടിയന്തിര സേന 85 പേരെ വെള്ളപ്പൊക്കത്തിൽ നിന്നു രക്ഷപ്പെടുത്തി. ക്ലാരൻസ്, നംബൂക്ക മേഖലകൾ പൂർണമായും ഒറ്റപ്പെട്ടു. കറ്റൂംബ, ഓറഞ്ച്, ഗോൾബേൺ, ഡബ്ബോ, യാസ്, പാർക്ക് എന്നിവിടങ്ങളിൽ വെള്ളപ്പൊക്കത്തിനും ബ്ലൂ മൗണ്ടൻസിൽ കൊടുങ്കാറ്റിനും സാധ്യതയുണ്ട്. അടിയൊഴുക്ക് രൂക്ഷമായതിനാൽ നദിയിൽ ഇറങ്ങുന്നവർ ജാഗ്രത പാലിക്കണമെന്നും അധികൃതർ അറിയിച്ചു.