മലയാളി യുവതി കൊല്ലപ്പെട്ട കേസ്; ജർമ്മൻ ഭര്‍ത്താവിന് 12 വര്‍ഷം തടവു ശിക്ഷ

ബർലിൻ: ജർമ്മനിയിൽ മലയാളി യുവതി ജാനറ്റ് കൊല്ലപ്പെട്ട കേസിൽ ഭർത്താവായ ജർമ്മൻ പൗരൻ റെനെ ഫെര്‍ഹോഫന് കോടതി 12 വർഷത്തെ തടവുശിക്ഷ വിധിച്ചു. 34കാരിയായ ജാനറ്റിനെ കൊലപ്പെടുത്തിയത് താനാണെന്ന് ഭര്‍ത്താവ് റെനെ അറസ്റ്റിലായ സമയത്ത് പോലീസില്‍ മൊഴി നല്‍കിയിരുന്നു. എന്നാല്‍ വിസ്താരവേളയിൽ പ്രതി നിരത്തിയ പല കാര്യങ്ങളും പരസ്പര വിരുദ്ധമായിരുന്നു. 

തുടർന്ന് ജാനെറ്റിന്റെ മാതാപിതാക്കളെയും റെനെയുടെ അയല്‍വാസികളെയും വിസ്തരിച്ചു. ശ്വാസം മുട്ടിച്ചും ഇലക്‌ട്രിക് വയറുകൊണ്ട് കഴുത്തു വരിഞ്ഞു മുറുക്കിയും കഴുത്തിനു പിന്നില്‍ കറിക്കത്തികൊണ്ട് ആഴത്തില്‍ മുറിവേല്‍പ്പിച്ചുമാണ് കൊല നടത്തിയതെന്നു പ്രോസിക്യൂഷന്‍ കോടതിയെ ബോധിപ്പിച്ചു. ഇതേ തുടർന്നാണ് വിധി. കഴുത്തിലുണ്ടായ ആഴത്തിലുള്ള മുറിവാണ് ജാനെറ്റിന്റെ മരണ കാരണമെന്നു പോസ്റ്റ്മോർട്ടം റിപ്പോർട്ടിൽ കണ്ടെത്തിയിരുന്നു.

കൊലചെയ്തതിനു ശേഷം റെനെ, ജാനറ്റിനെ സ്വന്തം വീടിനോടു ചേര്‍ന്നുള്ള പൂന്തോട്ടത്തില്‍ മറവ് ചെയ്തു. ജാനറ്റിനെ കാണാനില്ലെന്ന് വീട്ടുകാരെ അറിയിച്ചു. ഏപ്രില്‍ 13 മുതല്‍ കാണാതായ ജാനെറ്റിന്റെ മൃതദേഹം സ്വന്തം വീടിന്റെ പൂന്തോട്ടത്തില്‍ നിന്നും മെയ് പകുതിയോടെ പോലീസ് കണ്ടെടുക്കുകയായിരുന്നു. ജാനെറ്റ്, റെനെ ദമ്പതികള്‍ക്ക് ഒന്നരവയസ് പ്രായമുള്ള ഒരു പെണ്‍കുട്ടിയുണ്ട്. അങ്കമാലിയിൽ വെച്ചായിരുന്നു ഇരുവരുടെയും വിവാഹം.